【校長心聲】著重品德教育　李宗德小學校長︰未來領袖須有良好品德及宏觀視野

要數教育界朋友的金句，以下這句都應該排前三位︰「道德可彌補智慧的缺陷，智慧不可填補道德的空白。」香港人咁崇尚醒目仔、醒目女，家長們不妨諗一諗自己的仔女，智慧或者品德，哪一樣重要？不過好可惜，在我們的教育系統，無可避免會側重評估學生的智慧先，因為夠客觀、可量化，品德就係操行的等級，好難計分。

小朋友的角度又點睇大人呢？有間直資小學校長做過一個好有趣的調查，關於學生心目中好校長的素養特質（於2017-18年度進行調查），結果最多人揀選的最高五項排名依次序如下︰

仁慈和善（84%）
愛親近人（72%）
關心學生和老師（71.4%）
公平（66%）
公正（58.3%）

其他如善於聆聽、以身作則、做事負責、能幹、能管理得學校井井有條等，都有約40%或以上的學生選擇。

結果好清晰，小朋友心目中好校長特質，前5名都是品德的特質，至於能幹、管理等等，小朋友會覺得相當次要。我覺得，呢個調查都反映咗，小朋友心目中的典範是如何。

呢間學校成績優異係區內數一數二，而校長出名係著重品德教育，呢間係和富慈善基金李宗德小學，校長係鄒秉恩，佢經常話：「香港的『未來領袖』必須是有抱負，兩文三語必須掌握之餘，必須具備良好品德及宏觀視野。」品德，始終係做人至關重要的特質。

我好同意「道德可彌補智慧的缺陷」，我甚至覺得，有足夠智慧的人，都會知道品德有幾重要。

香港電台第一台《我們不是怪獸》「梁永樂-怪獸爸爸and friends」，周日晚10點新聞後播出。